اتحادیه فعالان حقوق بشر به مناسبت ۱۰دسامبر (روز جهانی حقوق بشر) می‌گوید که طالبان دست به نقض گسترده حقوق شهروندان افغانستان زده‌اند و باید به محاکم بین‌المللی کشانده شود. اتحادیه فعالان حقوق بشر روز سه‌شنبه، ۲۰ قوس (آذر)، در بیانیه‌ای افزوده طالبان در طی سه سال گذشته اساسی ترین حقوق شهروندان افغانستان را سلب کرده‌اند. در متن این اتحادیه آمده است: حاکمیت طالبان مملو از نقض حقوق بشر تمامی حقوق زنان و دختران، تبعیض گسترده قومی و مذهبی، سرکوب فعالان و خبرنگاران، اعدام‌های علنی و محرومیت شهروندان از ابتدایی‌ترین حقوق‌شان می‌باشد. این اتحادیه از دادگاه کیفری بین‌المللی خواسته است در کنار پرونده نقض حقوق زنان، نقض حقوق شهروندان افغانستان را در نظر داشته باشد. در همین حال، دفتر هیأت معاونت سازمان ملل در بیانیه‌ای به مناسبت روز جهانی حقوق بشر می‌گوید طالبان باید حقوق اساسی بشری را پذیرفته و به تعهدات خود عمل کنند. این در حالی است که در بیش از سه سال گذشته، شهروندان افغانستان از حقوق حیاتی‌شان از جمله آموزش، تحصیل، آزادی‌های فردی محروم شده‌اند و هرگونه اعتراض و فعالیت‌های سیاسی و مدنی شهروندان افغانستان سرکوب شده است.
